غذر x غزل

هاتوا لي الدفتر وجيبوا لي قلم = وبراد شاهي مخدر وسكر قليل
وهاتوا من صناعه قليلين الشيم = مالبوروا أحمر يرفع الراس الثقيل
أبغى قصيدة حب منظومه نظم = من صادق الوجدان والراس الهبيل
لعيون من حطت على قلبي ختم = وأسقتني من الحب ماءا سلسبيل
اللي رضاها طب وأجفاها سقم = اللي هواها يشفي القلب العليل
اللي خذتني من عذابي والوهم = من شمس عمر الهم للظل الظليل
أنا أشهد أنها آمال عمري والعشم = وأنها على هموم الزمن سيف ٍ صقيل
يالله عساني لا خلا ولا عدم = منك ياروح الروح في صبح ٍ وليل
في دنيتي دون البشر شوفك الأهم = ودون البشر ما أرضى لهمك بالقليل
أنا أعتذر عن ما بدر وانت الحكم = آمر على موتي وآجي صوبك قتيل
لكن .. على طاري القتل.. لبى الخشم = لبى الثغر والخد والرمش الظليل
لبى العيون الي رمتني بالسهم = لبى الصدر والورك والجسم النحيل
لبى السوالف في السكوت المحترم = لبى الدلع والغنج والبال الطويل
لبى الحلى ما ظن من شافك سلم = حسبي عليك الله وهو نعم الوكيل
والله ما كنك غير مرسومه رسم = جملك رب البيت سبحانه جميل
مفروض ما تزعل عساني ما آعدم = خل الثقيل من الزمن وسط النقيل
آمر وانا ما قول غيرأبشر وتم = آمر ترى ما فيه شي ٍ مستحيل
أنتي جميلك في ضميري له وشم = يبقى معي والله الى يوم العويل
والله يقدرني على فعل الكرم = والله يقدرني على رد الجميل

وسلامتكم