قبل يومين الخفوق اعلن عـن الحـب اعتزالـه قال مالي في الهوى رغبة ولا لي بـه مـرادي
يوم صادف فارعة في الطول مدري وش طرى له
من مفاتن وصفهـا جـاه ارتعاشـة وارتعـادي
مشيها مشي الحمام وخصرها خصـر الغزالـه
كنْ لها شهرين لا شرْبـت ولا طعمـت بـزادي
ارسلت من طرفها سهم(ن) طرحنـي لا محالـه
واحكمت زنزانتـي بيـن البياضـة والسـوادي
وانا قلبي لا نوى علم(ن)قعد لـه وارتكـى لـه
قال ما غيري لها مـادام نـاري مـن زنـادي
ابتـدت بالصيدليـة ثــم راحــت للبقـالـة
قلت بتبعهـا ومهمـا صـار عـز الله لافـادي
كلمـا ترفـع نظرهـا الا وانـا واقـف قبالـه
قالـت اركـد قلـت والله ماذبحنـي الا ركـادي
قالت انت؟ وقلت انا اللي من ركوده شان حالـه
قالت انت؟ وقلت انا طيـب ومتواضـع وهـادي
قالت انت؟ وقلت انا قالت بـلاش مـن الهبالـه
قلت انا لا اهْبل ولا مجنون لكن شخص عـادي
ماجبرتك تعشقينـي بـس انـا جيتـك رجالـه
ان صفا لي الحظ والا عـاد سويـت اجتهـادي
قالت ابعد عن طريقـي قلـت يابنـت استحالـه
ما سمعتـي قلبـي المغـرم يناجيـك وينـادي
ما سمعتي القلب يسأل وين قلبك عـن سؤالـه
آه مااكْبر كسـرة الخاطـر وياشيـن العنـادي
ما تشوفيني انتشيت من الهـوى حتـى الثمالـه
لا تخليني كما المهمـوم فـي سجـن انفـرادي
قربت مني وقالت هـات رقمـك فـي رسالـه
قلت رقمي قد كتبته لك علـى (علبـة زبـادي)
لونها في مثـل لونـك لـون يجذبنـي جمالـه
لونها رمز الصفـا رمـز التسامـح والـودادي
اتركي الارسـال والبلتـوث انـا مالـي ومالـه
ودي اسمع همستـك بالليـل لا نامـو العبـادي
دورت في اغراضها واستخرجتهـا فـي عجالـه
وانْقلت رقمـي علـى جوالهـا والبشـر بـادي
قالت اش رد الجميـل وقلـت ماغيـر الجمالـه
ناولتني من يديهـا الساحـرة (قشطـة بـلادي)
قالت افهم قلـت فاهـم والعيـون اكبـر دلالـه
قالت استنتج وقلت السـر فـي سحـر الايـادي
ناظرتنـي تبتسـم قلـت الشهـر بيَّـن هلالـه
الله اكبر كيف صادتني وانـا صعـب اصطيـادي
وسلآمتكم الجميع
قلم الكاتب
الشاعر خالد القحطاني
09-Mar-2010, 03:29 PM 
مشيها مشي الحمام وخصرها خصـر الغزالـه 
العرض الشجري
